中環人生

Demon Say

2009-06-08T20:07:00.002+08:00

之前因為有朋友的一句閒話，所以興起開了這個 BLOG，臨時臨急要起個名，唯有就地取材，身處中環思考體會人生，不如就叫中環人生吧。但之後發覺不大妥當。當然也是因為不想韜別人的光，而的確好容易互相混淆，誰累著誰也不個不好。

　　所以一直都想再改一個 BLOG NAME，易記又不會與其他同類內容的網誌名太相似。

　　簡單易記又特別，用自己的名字應該比較穩陣。但單單一個名字，又透著有點自戀狂，所以要加多一點點意思，這個便有點難度了。

　　一直都沒什麼頭緒，直至有一天，忽然想起了網誌的真正用途：吹水。

　　我的網誌供我吹水之用，那就再簡單不過了，所以開了一個新網誌：Demon Say (http://demonsay.blogspot.com/)。名易記，網址都易記，務求易記易去易上心。

　　網誌《中環人生》將會轉移到《Demon Say 》，希望各位多多捧場。

Demon
http://demonsay.blogspot.com

【中環．人生】

2009-04-16T00:30:00.000+08:00

之前有一位朋友跟我說，覺得我很嚴肅很認真，說看過我 Blog 裡的文章後，就更加肯定。能跟你把話說得那麼直的朋友，在今天是很難得的，哈哈。回心想想，本性之中實在是十分嚴肅認真，在公事上就尤其明顯。那位朋友講：「咁樣唔好架喎」。是的，我也知道真的不太好，但無奈本性難移。所以或許該有少少轉變了。

　　其實這些年的打滾，已經不太嚴肅，認真也頗能收放自如，只是文章之中流露的是自然本性而已。

　　早一陣子，因為另一位朋友，所以弄了一個 Blog，起了個名字叫【中環人生】。其實名字本身，是包含了兩個意思的。雖然有不少朋友都知道，我公司位置就是在中環。但其實，我由第一份工作開始，便未正式離開過中環，一個地地道道活在中環的人。中環對香港人來說，再作解釋有點多管閑事，所以不再多嘴。所以想講下另一半意思，人生。

　　想這個名字的原意，就是想寫一點工作上生意上的事情，有時又可以寫一點生活的瑣事，人生的體會。所以連同這裡的 Blog，都會一起轉變。況且內容廣泛一點，亦易寫一點。原來講到底，都是一個懶字。

　　話說回來，人生有很多不同階段。在某個時候，我們不太喜歡別人太了解自己，總希望讓人猜不透看不通，想自己與眾不同。人生必經階段。但隨著年齡漸長閱歷漸深，我們又會因為遇到一位了解自己的朋友而欣慰。人生有時就像不同的飲品，不同階段有不同的喜好。

　　正如對自己人生的期望與目標，也會隨年月略有改變。到有了一定的閱歷，你會明白原來生活可以很簡單，幸運快樂亦其實很簡單。人生，同樣可以十分簡單。簡單，是因為明白自己真正需要的是什麼。

　　之後會多寫一些輕鬆一點的文章，讓我自己也輕鬆多一點。哈哈 ~

【董事局】

2009-04-16T00:29:00.000+08:00

　　個名好似好嚴肅又大陣象咁，但係其實，佢只係好似令每間公司入面既文員一樣，只係公司營運系統既其中一個環節，唔好睇得太高高在上，雖然佢的確係。

　　好多朋友都會認為，大公司先會要董事局，細公司董咩事局丫？唔好玩啦！其實好多人對董事局都唔多唔少有點誤解。呢方面電視既影響力非常根深柢固。

　　好多公司經營者，都會認為細細地十幾二十人，又或者三四十人，唔好搞啦，幾個股東坐埋傾就得啦，又唔係大公司，整個董事局棧俾人笑。唔可以話佢地有問題，只不過，要睇你對公司發展有咩要求。公司要發展得好，一定要靠制度，有良好而明確的制度，先可以平穩咁運作。制度唔單止用來規範為員工，而且亦同樣要規範老闆。所以需要一個老闆專屬的部門：董事局。

　　有董事局，老闆就要跟董事局規矩做事，做任何決定之前，都要有規有距有程序，同員工平時處理日常工作一樣。公司不論大小，員工都需要有指引有規範，咁點解老唔需要呢？老闆雖然係公司的最大得益者，亦係公司的擁有人，的確係鍾意點就點。但係，如果你鍾意點就點，即係話公司其實根本就無方向，就算有方向，亦隨時出軌。

　　一般來講，我會建議我所有客人，不論公司有幾大，即使就得你幾個合夥人股東都好，一樣要有董事局。無人叫你通處四圍同人講架嘛。而最好，可以引入非股東職員，加入董事局。首先，有董事局，所有合夥人都有正式規範，所有決議都有紀錄，方便以後跟進，亦令股東習慣向其他人交代同負責。至於引入非股東職員，係因為當合夥人開始懶惰，唔太跟規矩做事，就需要一個身份唔同的人，從新整理氣氛。因為大家都係咁高咁大，又恃熟賣熟，慢慢一定會開始懶散，但係面對下屬，總要有番少少台型，氣氛亦會變得認真。

　　老闆，在某程度上，其實亦只係公司的其中一個員工，只不過呢個員工擁有最大權力。呢一點老闆們需要搞清楚，唔係好易會一舖清袋。

　　董事局雖然高高在上，因為佢真係操整間公司的生殺大權。但其實，最大作用反而係規範公司股東，即係老闆。老闆都係人，一樣會出錯，如果老闆可以任意妄為，鍾意做咩做咩，仲唔需要向任何人交代，咁同合埋眼渣車毫無分別。所以整番個官方制度，俾老闆交代下，又可以集思廣益，對公司對老闆都有好處。

【個人風格】

2009-03-28T16:38:00.001+08:00

浸泡職場有一定日子，唔多唔少都會開始慢慢建立起個人處事風格，雖然大部份的風格都係大同小異，但畢竟都係每個人唔同。處事風格其實亦係由個人性格演變，性格如何，風格大致亦如何。風格各有不同，有人受有人唔受，好難講咩為之好，而且要講又係好長。所以今次雖然題目係風格，但其實並唔係講風格。好玄？哈哈。

　　處事風格由性格而來，而且要經過好一段時日去琢磨，先可以成形。更重要係，成形之後仍然須要不斷吸收檢討，取長補短去蕪存菁，先可以慢慢做到爐火純青。

　　同三四十年紀的管理層吹水，發現佢地普遍對時下十零歲至二十出頭的年輕人，有一個共同不滿，就係太有風格。

　　呢一點相信大家或多或少，都應該有所體會。包括本身是年輕人的朋友。經典對話如下。上司：「呢個工作你要咁樣，然後咁樣，每個程序都要做齊，而且要留底。」年輕人：「得啦，我有我自己方法去做，做到就得啦。」係唔係好熟口面？又或者不時會聽到年輕人講：「我有自己一套，呢個係我既 Style，點解一定要跟佢果套？佢跟我唔得咩？」有冇印象自己講過呢？非常坦白，我講過，而且講過好多次添。結果係點呢？

　　年輕人因為剛剛開始長大，開始覺得自己成熟，所以好希望得到個人肯定。而且亦因為生理上的變化影響，會好重視自己的觀點，好容易會抗拒其他人意見。我想大家都明白呢一點，係人生必經階段，唔需要否認，捫心自問，大家都係過來人。

　　咩原因都好啦，重點係，你果套係唔係一定正確呢？好多年輕人會話：「我唔理，我一定跟自己果套，就算係錯，都係我自己揀。」又係熟口熟面？之前講過，高質領導首先就係要將自己果套放低，然後先可以尋覓到　最佳處理方法。高質領導尚且如此，年輕人又同何呢？

　　大家日常面對大大小小的問題事情，最終目的都係想解決問題，而唔係個人表演，對嘛？既然係咁，其實係唔係應該以最佳方法為大前提，而唔係邊個果套呢？再者，風格係要經過歷練琢磨，先會成形。年輕人初出茅廬，未經世情，處事處人所用的，其實只係性格，的確係有自己一套，不過卻並不是 Style。

　　想要真正擁有自己的風格，並不容易，亦不困難。只在乎我們的心態。

　　年輕人初入職場，少不免好多事情未必看得順眼，有自己的一套睇法，唔願意接受式者跟隨別人意見。呢個其實好正常，不過心態上要有正確處理。我們係應該要保留自己的一套睇法的，但同時接受別人的意見，或者既定的規則。即係話，內心清晰地保留自己的觀點，而行動就跟據前輩或規則去做，重點在於，一路做一路去印證。經過事實的印證，你果套風格先實至名歸嘛。

　　我地最初學寫字，都唔可能一開始就自由發揮啦，係咪？讀書還讀書，工作還工作。讀左幾多書都好，離開讀書環境入到職場，就係另一個新開始。既然係一個新開始，就應該從頭學起啦，對嘛？其實面對每一件事情，我地都應該抱住從新開始的心態，保持自己果套，去印證客觀規律。

【圓滿的溝通】

2009-03-17T16:42:00.000+08:00

子曰：可與言而不與之言，失人；不可與言而與之言，失言。知者不失人，亦不失言。備受萬世所推崇景仰的偉大教育家，早在春秋時代，已經提出了溝通的基本條件，既不失人亦不失言，也就是要適時適人適地適事。按理說，中國人經過了兩千多年的琢磨切磋，不知幾番的沉澱發酵，時至今日應該已成千年佳釀，香醇醉人。可是不單外國人，就連中國人本身，也同樣感到與中國人溝通，是十分困難的事情。難道陳酒過醇，未嚐先醉昏？

　　曾仕強先生的《圓滿的溝通》，深入地剖析了中國人溝通時的心理狀態，亦分析了東西方文化差異對溝通的影響，同時就不同的問題和情況，提出如何改善及增進溝通成效的建議。首章便開宗明義提出，要在「先說先死」及「不說也死」之間，兩者兼顧而取得平衡，以求「說到不死」的技巧。融合前後篇章，作者一再強調，在「懂得」說話之先，必須學懂慎言。能不說就不說，不能不說則求說得恰到好處。

　　中國人文化源遠，智慧深長。幾千年來在說話溝通的範疇，亦不斷揣摩琢磨，累積更多的溝通智慧。然而累積愈多，顧慮也愈多。加上中國人民族本身對週遭事物的警覺性很高，所以懷心也重，漸漸便發展出一套「防人之心不可無」的保身明哲，當然亦同樣應用在溝通之上。造成了不願開口說實話的普遍習性，總是東拉西扯無關痛癢一番，還未必會切入正題，往往顧左右而言他，旁敲側擊試探揣摩。大家對對方所說的，都將信將疑，既不信也不是不信，既懷疑也不懷疑。可能原本簡簡單單的幾句話，卻演變成一場漫長的說話攻防戰。

　　中國人自詡禮義之邦，凡事都在禮節上頭下工夫。說話太直恐怕會使對方難受，也容易得失對方，這便失禮了。還是婉轉措辭，說錯了自己也好圓場，顧及了對方面子，也為自己留了體面。這本來是好事，歷史上不少有高度水平的對話，都是用辭婉約而言簡意賅。如《左傳‧鞌之戰》中賓媚人的措辭，以戰敗之師求和，言辭誠懇但不失國體，婉轉地將兩國利害關係表明。但這可是需要有很好的語文基礎，才能準確發揮真正的神韻。

　　曾先生提及，溝通須要知所進退，何時該說話，何時要沉默，何時需含糊，何時當直陳。能夠掌握進退之道，審時度勢緩急有致，才是中國人溝通藝術的真正神韻。正如前述，這可是需要有很好的語文基礎的。所以，或許正是因為現在的中國人，由於經過千百年的薰陶，潛移默化，與生俱來已經擁有這種溝通藝術的本能。在意識中本能地存在婉轉的技巧，但卻不是所有人都具有準確拿掐的能力、清晰的思路和有效的表達能力。高超的溝通藝術，若徒具其形而無其神韻，溝通往往左穿右插卻不得要領。

　　慎言慎行，也是我們的傳統智慧。書中提到寧可少說話，使人懷疑自己淺薄；不可多說話，證明自己果然如此。少說話並非不說話，唯有懂得少說話的道理，才能在需要時言之有物，言之成理，既不失人也不失言。會說話而少說話，才是真正的懂得說話。慎言慎行，讓我們能夠有更充裕的空間，去考慮該用怎樣的溝通方式，才能有效與對方溝通。我們必須因應不同人的不同取向，適人適時適地適事之餘，還要適法。溝通不得其法，再適合的條件，也是枉然。

　　溝通是一種相互作用，發訊者與受訊者之間的技巧與態度，影響整個溝通的成效。我們所需要的，是在溝通的過程能夠達到預期的成果，要的是一個最合適當時的方法，並不能一以貫之的。理論是一般性的，但現實卻是特殊性的。我們只能以理論基礎，因應斯人斯事斯時，在兼顧及說與不說的情況下，考量出一個最佳的方法，以達至有效而圓滿的溝通。

【領導素質 3】

2009-03-15T22:08:00.001+08:00

真係十分十分抱歉，過完年之後真係忙到不得了，當中都有少少野值得同各位分享，遲一陣遲一陣，先開始還一還領導素質條債。

　　上次講到如何選擇一個好老闆。性質上老闆分兩種，一種係真老闆，即係真真正正出糧俾你果位，操整間公司的生殺大權；另一種係職權老闆，即係你頂頭上司，佢冇份出糧俾你，不過就有份決定你有冇人工加，公司生殺大權無佢份，不過就負責你的生殺大權。

　　其實出來做事，好老闆真係可遇而不求，正如世上叻人一定相對少，係咪？因為咁，所以要懂得選擇，懂得分辨邊個老闆先值得你死心塌地，唔好遇到好野都錯過。再者，各位日後都有機會做人老闆，己所不欲勿施於人嘛。

　　不過有一點要記住，唔好因為而家個老闆唔好，就放軟手腳渣流灘，要明白除左你老闆，身邊仲有好多觀眾。當中可能包括一位非常好的老闆，你表現唔好，佢點挖你呢？

　　理論上的好老闆，條件詳述隨時可以寫篇博士論文，但係當中唔少部分，都只係理論，現實中並唔常見，所以我想講下，現實之中一個好老闆的臨床徵狀。

　　之前都講過，所以好老闆，係一位現在未有好成功，但係已經具備成功素質的老闆。這些條件，可以初步判辨呢個老闆有冇潛質發圍。

　　成功人物，一定對前景有好清晰的睇法，而同時可以兼容其他不同意見，即係話，佢要有清晰的觀點同目標，而又唔會堅持自己一定岩，會樂意聽取同吸收並他人意見。而且要有堅定信念，相信再大的事情都可以解決，唔會一有咩事就死死死叫救命。人地成日講甚麼喜怒不形於色，仲講到好似成功人物一定要咁先得，其實並不見得係咁。只要在大事發生時，佢能夠沉著應付，不急不燥從容處罰，即使個樣俾你見到佢個樣好嚴肅，都根本唔係問題。堅定信念，更加包括有足夠的感染力，令身邊的人有充分的安全感，同心協力去面對問題。

　　另外，出色的老闆，一定要懂得同樂於認錯。呢點唔單止係品格問題，因為呢個其實係關乎整體士氣的元素。老闆死不認錯，下屬一定有樣學樣，一敗；老闆有錯而唔認，一定會搵野遮遮掩掩，甚至搵人代罪，小人必生士氣必闕，二敗；有識之士見你文過飾非，已經睇你唔起，仲點會輔助你？三敗。一個肯認錯，而知錯能改的老闆，先可以正確解決困難問題，令下屬正面去看待任何過失，立即補救，唔會掩住問題推卸責任，去到最後積重難返。

　　人事管理係老闆的主要工作，一個老闆，會首先考慮下屬的情緒變化，再作出適當的處理。而且唔會故意製造下屬之間的利害矛盾，亦唔會將愛惡表面化。人一定有偏好，一定有某些人特別容易討你歡心，呢個唔係問題，人之常情嘛。但係唔可以將佢表面代，即係擺明偏幫偏袒，咁樣不但損害士氣，亦同時俾人知道你喜好，係十分危險，再者，你擺明錫某人，其實係害左佢，一來佢唔會再努力上進，二來其他同事唔會喜歡佢。

　　在處理人事管理時，如果佢能夠先耐心聆聽所有人的說話，先再作出處理，就係十分出色的方法。處理人事問題，最怕係心存定見，一定要將每件事情獨立去睇，獨立去處理，當然亦要參考以往的事件，但記住，只係參考。

　　以上係個人素質的條件，讀書學唔到，有就有冇就冇，當然如果佢知道自己不足之處，係可以慢慢去學習，經過用心磨練，都會做得到。

　　除此之外，就係一些硬件，包括佢見識要廣博，對事物理解力要高，對事情的洞察力要強，有容人之量，而且要懂得真正真心去關心別人。

　　如果遇到咁樣既老闆，你可以好好同佢相處一下，睇下合作得愉唔愉快，如果合作得來，咁你真係可以為佢忠誠服務，只要你有料，佢一定會重用你。即使能力一般，佢都會好尊重你，咁樣你仲想點？

【領導素質 2】

2009-03-15T22:07:00.001+08:00

出色的領導者，必須要有知人、識人、相人、用人及容人之道。個人的力量再大，都只不過係一個人的力量，真真正正要成功，必須要懂得如何團結和運用人才。領導，就係用人。

　　大家熟悉的曹操曾經說過：吾任天下之智力，以道御之，則無所不可也。不論各位對曹操的睇法如何，我們不能不承認，他的確具有卓越的領導才華。要講領導，最好的題材真係非三國莫屬。三家君主，各有不同的風格特色，同樣能夠知人、識人、相人、用人及容人，只不過各自因應本身性格特質去演繹，各有所長。

　　所謂知人識人，其實好類似，簡單講就係了解同認識。有發掘別人潛質才華的能力，有鑑別能力高低的能力，對別人性格能力好惡長短的掌握。首先要有能力準確地認識身邊人的長短高下，才可以做到因才而用，人盡其才。因為對於真正有才華的能人，好多時候物質利益並不能打動，反而一個有能力真正欣賞他們才華的領袖，才能令他們心悅誠服，鞠躬盡瘁。清代毛宗崗說諸葛亮：苟愛我而不能用，用我而用之不盡其才，反不及欲殺我者之知我矣。真正欣賞，並不只是愛或者用，而係將其才華盡量發揮。

　　所謂相人，係指在未有機會深刻了解之前，從對方的行為舉止談吐見識，初步去評估一下對方的為人；以及在相處共事之下，深入去了解對方的真實內涵。這個相字，與睇相有些相類。其實相學並非迷信，而係一門非常精密的統計學，有機會再分享。

　　用人、容人，此面項真真密不可分，因為你要用一個比自己優勝的人才，首先你要有容人之量，不能妒賢忌能。用人以才，因應不同的才能長短，安排適當的職位工作，有時候下屬未必能夠了解自己本身的長短，你就需要去作出協助，令他明白及認同何處是最合適的崗位。用人需要先能夠知人識人相人，容人則只係需要器量同胸襟。曹操能夠出色地用人，但到後期卻不能容人；孫權極能用人，容人卻取決於愛惡，龐統因不美周瑜之才，即不為所用；劉備在用人容人方面，其實為三家最卓越者。當然此處只論用人，三人的個人才華又作不同。

　　縱觀古今，有兩位領導者，不論在個人才華以及用人之道，都非常出色，亦十分難得，唐太宗李世民及清聖祖康熙，不但個人才華能力出類拔萃，而且極擅用人容人，兩位的故事，相信大家都耳熟能詳。

　　作為打工仔，亦要懂得如何擇主而仕，一個有料之人，一定懂得分辨人主的高下。一個現下並非已經好有成就的高班的人主，就係各位的尋找對像。

　　打工仔如何揀老闆，下一期分享下。

【領導素質 1】

2009-03-15T22:05:00.001+08:00

領導素質聽落好似幾空泛，又有少少悶。但如果話，講下如何做一個好老闆，順便數下部份老闆的不是之處，相信大家立即明白，題目其實想講咩。

　　　　雖然小弟自己都係做老闆，但係我亦做過人地伙計，打過工，而且其中更加打過天下間最難打的工，自己人工。同時，因為工作需要，不斷都會面對同接觸其他公司的老闆，幫佢地公司做策劃分析，所以我都算係半個打工仔，因為一樣都仲要揍下老闆。

　　經過差不多十年的體會，對老闆呢種生物，有少少見解，想同大家分享一下，應該都有幾期可以講。分散隨便咁講下啦，唔好咁嚴肅。

　　原來老闆只係一個身份，所以會有稱職有唔稱職，做得好唔好，就真係睇佢自己功力同天份。不稱職的老闆，其實無其他特別專用稱呼，因為不論員工以至行家，對不稱職的老闆，都不會有特別感覺。而真正稱職又出色的老闆，會稱之為領導者。開始對番少少標題。

　　領導，本身已經是一個專業，一種技能。所以你會發現，個人辦事能力非常出色，但不能帶領其他人一起工作，簡單講，單打獨鬥天下無敵，佈陣用兵唔係好識。但因緣際會，佢又有可能會成為老闆。其實老闆本身如果能夠有領導管理能力，當然最好。但在某些情況，因為有極其出色的才華，繼而發展成為企業，卻本身欠缺領導管理能力，亦未必不行。蓋茨天才橫溢地成立微軟，他未必懂得管理，所以當公司發展到一定規模，蓋茨選擇交由專才去負責行政管理工作。

　　所以，重點其實在於，作為老闆者是否願意而且能夠，確切地認知本身的長處短處。相信大家都會遇過一些老闆，從不認為自己有錯或者會錯，有問題的永遠一定是你而不是他。雖然事先你已經百般提醒，佢依然隻字不入，但係出事之後，佢又會忘記得一乾二淨，甚至講成，只係其他人無盡力配合佢既完美計劃。

　　又有一類老闆，每日向下屬大發偉論，將自己的成功經歷，活剝生吞地灌輸。他的成功是實實在在的還好，最怕他自己也是得運成功，卻被勝利遮蔽，連自己本來的短處亦看成長處，真係血都嘔乾。

　　記得之前寫過，做上司唔一定要好叻，但最起碼要有自知能力，知道自己所擅長與不擅長，更加要勇於承擔責任，敢於下放權力。

　　有時候，只要老闆肯一同承擔責任，下屬自然唔敢卸膊，這是一個榜樣，老闆如何，下屬亦自當如何。同時，老闆要懂得在適當時候下放權力。你要人幫你，你先要予以足夠條件，你叫完人做，自己又手多多，俾你都唔高興。

　　不論做上司老闆，要稱職的話，首先係要有知人、識人、相人、用人及容人之能。這個下一次詳細再講。

　　講左好多唔好野，我地下次講正面野。

【放榜】

2009-03-15T22:02:00.000+08:00

今次破下例，唔講商業講學業。我地講下放榜。

　　人生每個階段，捱緊果時，總係天大的事情，走投無路，處處難行。但係過左之後回頭一望，其實都冇咩咁大不了。

　　會考就來放榜，我知道呢度有好多朋友，都係應屆會考生，有ｄ就係之前放左榜的ＡＬ同學。我兩隻榜都放過，亦兩隻榜都衰過。有咩咁大不了？咪一樣好地地，consult 緊ｄ大學畢業生做野？當然啦，衰過，之後就要想辦法搞番掂，所以我都唔係衰完就由得佢，我都有努力解決問題架。　　呢兩個試，的而且確，對人生有好大影響，但並唔係代表全部。

　　我地不如試下計一計數。由會考計起，順利的話，兩年預科，加四年大學，一共六年，係咪？

　　如果會考唔順利，咁點呢？最壞打算，讀兩年文憑，加一年高級文憑，然後銜接大學第二年，即再讀三年，大學畢業，計一計，一共六年。咦？你蝕左ｄ咩？哈哈。　　所以，有好多事情，只要你轉一個方向，原來根本唔係問題。

　　再者，你中五出去搵野做，一樣可以邊做邊讀，如果係大公司，仲可以向公司申請津貼添！讀一ｄ同工作相關的科目，你會發現，學得特別快，效果特別好！因為你有機會實踐嘛。你可以照樣讀文憑，再轉高級文憑，好彩的話，可以接到大學最後一年添，認真慳力，更重要係，你比順利入大學的同學，多左一樣十分重要的條件：工作經驗。

　　當然啦，如果順順利利入大學，可以享受一下大學生活，擴闊生活同社交圈子，絕對係好事。但係入唔到大學，亦唔係咩大件事，一樣可以讀好書，一樣可以識更多朋友，只不過你要做多少少野之嘛。

　　公開考試，唔多唔少總要講點運氣，呢個係事實。不過，如果真係咁唔好彩，成積唔太理想，咁就應該認真去面對唔理想的原因。學歷固然係重要，讀好書，你條路係會好行好多。但係唔代表讀唔好書，就會冇路行。

　　所以，首先應該想清楚，你究竟想點？你係真係有心讀書，只係一時失手，或者一時懶左，咁就要好好收拾心情，痛定思痛，下年再考過。但係如果呢一刻你根本冇興趣讀書，咁就不如搵一份適合自己的工作，然後再去進修。

　　我地面對問題時，需要的做的，係搵一個最合適的解決方法，而唔係你想點去解決。　　好好面對自己，好好為自己打算。

　　如果大家有私人問題想傾，歡迎直接找我架。我幾乎每日都要做心理輔導，同時要幫人解決問題同困難，熟手技工黎架！哈哈。

　　講真的，如果你地有問題想唔通，想有人傾下俾下意見，真係可以找我，我十分樂意同大家交流下。可以 email 俾我 : demon@msbc.com.hk ~~

【老油條】

2009-03-15T22:00:00.000+08:00

老油條有兩個意思，第一個解釋係來自油條（油炸鬼）本身，以前賣剩的油條，隔夜之後第二天再番炸，會特別鬆脆，價錢亦會比新油條略貴。第二個，就係指機構入面，其中一部分做上了一段長日子的資深同事。點解只係其中一部分呢？因為並不是所有資深員工都係老油條。

　　在一個機構會做了好一段日子，自然對機構的運作非常熟悉，而且亦能夠掌握上司的喜好，加上日子有工，對部門內的各項工作，都有一定認識。隨著機構內，不斷有新人加入，又不斷有舊人離開，呢班一直都留低的同事，慢慢變成老師傅。即使有新入職的同事職位本來比佢地高，有時亦要去請教佢地。

　　這個情況，本來係好事。但可惜有部分呢類資深職員，將佢地的優勢，運用在卸膊吞 pok 上面，就十分討人厭。由於熟悉機構內部運作，佢地懂得點樣偷懶，知道邊樣工作可以卸俾其他人，邊樣工作易做又邀功。又會蝦新同事，事無大小都推俾新同事，然後自己假扮日理萬機。老細問佢有咩做，佢就將原本卸左俾人的工作，講成係自己負責。有同事睇唔過眼，話佢兩句，佢會大聲過你，同你講佢好多野做，好忙！

　　加上佢地大多數都跟左個老細好多年，所以自以為十分能夠掌握老細的喜好同要求，所以好多時，明明自己做唔掂，反而向老細炸形，要求老細配合番佢。而且，佢地會向其他同事擺款，不論職位比佢高定比佢低，一律擺老資格，指指點點。

　　呢一類同事，其實會對機構唔會真係造成好大損害。不過會影響其他同事的工作情緒（因為真係好討人厭），亦做壞晒公司規矩，做唔切做唔好的工作，一律用佢地的方法去推卸責任，甚至要其他同事一齊分擔。

　　而最令老細討厭的係，佢地自以為掌握到老細心思，所以為所欲為。但係老細正正最討厭係呢點。

　　作為年輕一輩，大家遇到呢類老油條，其實冇咩可以做。因為你老細唔炒佢，一係根本唔覺有問題，一係就仲未係時候炒。咁你可以點呢？

　　大家面對呢類同事，多一點包容啦，佢真係有料，就唔使做老油條。同佢地一齊工作有個好處，可以訓練自己的危機處理能力，同埋危機管理技巧。因為你唔知佢幾時會爆鑊，所以反應能力要好好；既然佢係不時會爆鑊的話，你亦要對佢做好危機管理。呢兩項都係一個管理人必備條件。

　　當然啦，相處過程當中，你可以適當地而客氣俾佢知道，你並唔係傻既，只係唔同佢計較。咁樣佢會對你收歛少少。

【做生意 3】

2009-03-15T21:58:00.000+08:00

講左兩個星期，今日應該要完稿喇！

　　之前講左好多有關生意人的心理素質，最後想講下，做生意其實應該要有咩條件。

　　首先，要有一個你自己好熟悉的範疇，你可以駕輕就熟地處理當中大部份的問題。所謂唔熟唔做，生意最重要的，係業務基礎，要有穩固的基礎，你先可以有無限發揮的可能。簡單來講，即係要先搵到自己的專長，然後利用自己的專長去累積足夠的資產，然後再尋找更大的發展空間。

　　其實做生意同讀書一樣，要講興趣。只要你對果件事有興趣，你先可以無限付出而唔氣餒，做生意唔可能一步登天，當中會有好多好多挫折同失敗，如果你對你門生意所做的事無興趣，兩下就會沉。

　　其次，要有良好的人際基礎。即係首先要識做人。唔係叫你去擦鞋奉承，千萬唔好誤會，簡直兩回事。

　　識做人，其實係指你懂得為別人設想，懂得用別人的角度去睇事物。你一味只係諗自己想點自己的感受，唔願意妥協，唔願意讓步俾人，唔願意包容不同意見，就唔好再考慮做生意。

　　美國總統福特講過，要將自己隻腳放進別人的鞋子。意思就係要了解別人的感受。做生意，係要搵市場上面的錢，要搵消費者的錢，你淨係諗你自己想點，而唔明白人地想點，你點可能搵到佢錢呢？

　　而且，良好的人際基礎，仲包括你要樂於助人而不計回報，真心去幫助有需要的朋友，唔好成日諗邊個朋友可以幫到你，要諗自己有咩可以幫到朋友。在你幫朋友的過程，你其實已經累積緊經驗。其他人見你幫朋友做得咁好，對你自然有信心，先會同你做生意。

　　要講，其實真係仲有好多可以講。不過，我試下用最簡單的總結，同大家分享下做生意的大方向思維。

　　做生意，唔好諗住可以一朝發達，咁樣你一係好快沉左，一係好快破產。大家眼見到的成功例子，你以為佢係一朝發達，但其實過程當中的辛酸，佢唔會同你講。

　　做生意唔好一味諗賺錢，淨係諗賺錢，其實永遠賺唔到錢。要用心去諗，點樣將生意做得最出色。只要你出色，又肯幫人，態度誠懇友善，生意自然會送上門。

　　營商之道，以利為本，非唯賺利，更賺人心。

　　所謂賺人心，並唔係門面功夫，而係真真正正令人心悅誠服，賺取別人的尊重的愛戴，先至係真正的賺取人心。

【做生意 2】

2009-03-15T21:56:00.000+08:00

做生意，並唔係一份工作，係一個冒險的旅程，冇人知會去到邊度，亦冇人知結果。所以，大家打算做生意之前，先要睇下，你有冇以下的條件。

　　首先，你有冇冒險精神同毅力呢？唔好因為唔知做咩好，又唔想受氣，不如做生意啦。因為第一，你連自己都唔知自己想點，你憑咩去管理一門生意呢？做管理，一定要好有方向感，可以帶領其他人行前一步。甚至小本經營開間士多，你都要知道入咩貨去得，咩貨只係要來看門口，係咪？第二，受氣。我可以保證，你做生意所受的氣，絕對唔會比你打工少！更甚，你打工仲有得閃，有個老闆俾你賴，到你自己做老闆，你就要一個人食晒。

　　冒險精神同毅力，係商場必備條件。

　　要有冒險精神，先可以開創新局面，勇於嘗試，敢於挫敗。冒險，就係一幅勇於甚至係樂於挑戰同時接受挑戰的胸襟。如果平時遇到困難會惱怒，或者有事情唔順心就發脾氣，就要先好好磨練一下心理素質，先再諗做生意。

　　毅力，係包含堅定信念同敢於挫敗的精神。善於處逆境，在事事不順的環境下，仍然可以平心靜氣，找出問題根源，然後對症下藥，堅持自己的信念，面對挫折而不氣餒。主要在於，處理逆境身體力行的心理素質。

　　當然啦，呢度所講的，係成功商人所須具備的條件。大家會發現，有好多成左功的商人，好似都未必做得到以上所講。是的，呢個係事實。

　　成功與否，其實亦要講命數，有好多人成日講人定勝天。唔能夠否定呢句說話，因為天助自肋者，你要先做好自己本份，先會有運行。但係有好多成功例子，真係要講一聲好運。就算係一些憑真本事真實力的成功人仕，都係咁講，有某幾次關鍵時刻的決定，都只係搏一搏，勝敗之間，真係講點運。

　　咁樣講，唔係叫大家咩都唔好做。反面只係想幫大家做到一點，一個成功必備的要點：平常心。

　　要真正有平常心，先能夠處萬事皆從容，猝然臨之而不驚，無故加之而不怒。亦會明白，你盡了全力，做到最好，唔代表你一定就會成功。只要你明白左呢點，你就可以從容咁面對挫折，可以平靜地面對你的挫敗，然後從中得到進步。

　　面對挫敗，如果只係不斷諗自己已經做到最好，點解唔得，然後好唔開心，好唔憤氣。咁你呢個挫敗就會變得毫無價值。任何挫折，只要正確使用，都可以成為你成功的重要踏腳石。

＊死啦，兩期都未寫晒

【做生意 1】

2009-03-15T21:55:00.001+08:00

　　同好多朋友閒談，發覺原來大家對做生意呢個行為，有好多唔同的睇法。

　　普遍初初開始創業，又或者準備創業的朋友，好多時注意力會集中在：搵錢～　做生意的目的就係搵快錢，搵大錢，所以只係集中去諗，點樣可以做到大生意，發到圍，要穩定不如打工啦。佢地都有個共通點：快。要求反應快、轉數快、搵錢快、退休快。不過坦白講，大部分的結果係：死得仲快。

　　另一類係做左好多年生意，都係和和果果，搵到食又過得去，搵到的錢多過打工，但係就自己話事，唔使睇人面色。佢地當門生意係自己份工，兼夾家庭的一部分，叫埋老婆阿仔姨仔細妹阿哥表姐舅父，成間公司都係親戚，入到去無人叫名，淨係叫輩份稱呼。佢地認為咁樣係家族生意，咁樣先穩陣。

　　除左年資，仲有其他種類的做生意人。做生意人唔同生意人，生意人係真正的商人，具有經商的素質。做生意人，只係行為上做生意，而未必真係識做生意。

　　商場如戰場，呢個係事實。但絕對並不是你死我亡，呢個層次實在好低。孫子兵法講：上兵伐謀，其次伐交，其次伐兵，攻城之法，唯不得已。你死我亡，只係攻城的層次，低得好交關。　　

　　治大國如烹小鮮，要戒急用忍，耐心細心去做。做生意其實亦一樣。

　　我地首先要明白，做生意，當然目的係為賺錢。但係如果只係賺錢，你根本唔使做生意，打工又得，嫌慢可以炒炒賣賣，一樣搵到快錢，點解要做生意呢？

　　做生意，首先你要知道，自己想要的是什麼。

　　你點解想要做生意呢？係你真係有一個理想，想去完成，想建立一門理想的業務，一門你喜愛的業務。定還是只係唔知有咩好做，又唔想俾人管，不如做生意自已做老板啦。

　　真正的商人，係首先知道，自己適唔適合做生意，包括決策能力、應變能力、見識胸襟、學識智慧、心理素質、經驗悟性，同埋性格器量。然後再睇下，你自己有咩理想？做生意冇理想，冇抱負，十居其九都唔成功，又或者會行歪左路。

　　你可以問下自己，做呢門生意，你有咩期望，有咩願景？你希望可以做到點樣呢？又希望想做到 d 咩呢？然後就住你的理想，去計劃一下你門生意點做。

　　好長，下星期講埋下半截 ~~

【信用卡救命】

2009-03-15T21:53:00.002+08:00

最近有幾個客人，都係打算開公司創業。幫佢地打點開公司的文件同手續的同時，我都會提一提，如果佢，或者佢地，本身係打緊工，然後投身創業，就要襯而家仲有入息證明，申請定兩三張信用卡，若果時間太傖促，都要申請一兩張，因為同一時間，申請兩張信用卡，應該都批得晒，太多的話，銀行多數唔批，因為驚你申請完碌爆佢走佬。

　　「點解要申請信用卡呢？我已經有一張啦，都用唔晒，我用錢有好節制架，唔使啦。」　　

　　呢個幾乎係我每次得到的標準答案。

　　當然啦，創業的首要條件，就係要有正確理財觀念，自己使錢都冇節制，根本唔應該做生意。但係商場上，唔係你有計劃，就代表一定唔會出問題。往往有好多意想不到的問題，令到你疲於奔命。尤其係資金周轉。

　　我地唔係含住銀匙羹出世，唔會有一大批資金等住我地去用。基本上，尤其創業初期，真係樣樣都係剛剛好夠用，好多時仲要倒貼。咁緊繃的財政狀況，一有咩突發事故，點樣應付呢？　　最簡單，你接到一單生意，而呢單生意，需要一個設備先可以完成，但係你公司唔夠現金去購置，咁你接好唔接好呢？唔接，不但少左收入仲冇埋個客；接，你又冇能力完成。

　　再者，一間公司營運，會有好多經常開支，如果你手頭現金有更大用途，例如要為生意墊資，咁公司的日常開支點辦呢？

　　一張信用卡，可以幫你暫時，係暫時，解決你當務之急。咁強調暫時，係因為，想提醒大家，信用卡係最後防線，唔好濫用，唔好依賴。

　　因為大家創業初期，根本唔會有入息證明，好難申請到信用卡，所以要襯仲有份工，銀行仲有薪金紀錄，申請定兩三張，佢地隨時可以救你，救你公司一命。

　　做生意唔係賺就蝕，最重要係，賺同蝕都係在你預期之內，因為如果賺左自己都唔知點解賺，其實一樣十分危險，蝕左咪守下囉，但係你要守，都要有足夠準備，而信用卡，就係其中一個後備保險。要賺錢要成功，首先第一件事，係要令自己唔好輸。想令自己唔好輸，就要有周詳計劃，同足夠準備。

【耍花招】

2009-03-15T21:51:00.000+08:00

大家都知咩係耍花招，甚至經常做添。其實花招，真係要識，亦需要用，但係要知道，咩時候先可以用。

　　最常見的例子，就係用看似十分圓滑的說話技巧，去跟別人溝通。講果個以為自己講說話好婉轉，或者技巧地將明明要人幫自己，講到好似自己幫緊人咁。又或者帶人遊花園，又或者做小動作，等等等等。

　　好耐之前，我已經成日提醒自己：聰明人面前，唔好做蠢事。可能你對住一個蠢人耍花招，但係，真係的觀眾，係你地身邊的人。你或者可以肯定，你的對手係蠢人，但係你可以肯定，身邊所有都係蠢人嘛？大部份喜歡耍花招的朋友，都會不自覺地，認為自己咁樣做好圓滑，認為咁樣好有技巧，係 "醒目" 的表現。但係，一山還有一山高，而且真人永遠不露相，你以為你聰明絕頂，其實只係因為你根本未見過高人出手。

　　我曾經十分鍾意耍花招，老實講，亦玩得頗為出色。但係慢慢發現，好似唔多對路，真正的高手，唔應該係咁樣，唔應該咁花巧，唔應該咁多招出。高手過招，一招起，第二招已經止，高下立見勝負立分，邊有咁多時間，仲俾你慢慢玩花招。

　　當你對住個高手耍花招，其實你係侮辱緊佢。因為你耍既花招仔，佢全部都識，而且一定比你純熟一萬倍，你仲對佢玩，你未行佢已經知你出邊科，死未？更重要係，佢一見你耍佢花招，佢已經認為亦知道，你欠缺左誠意，佢根本唔會對你有好感。

　　人與人之間的溝通同接觸，都係以　誠懇　做大方向，先可以傾得埋，大家互耍花招，到最後至會浪費大家時間。我地以誠懇為中心，在有需要時，耍一下花招，咁樣先係高手。下下一出就花，即係唔花啦，係咪？況且，高手唔會有興趣同你玩花招，真正的高手，出手簡單而直接，但係一手就中要害，唔會同你浪費時間。

　　花招係要識的，亦要學習運用，因為適當地使用，亦係一種藝術。因為佢的確有緩衝同潤滑作用，但係你要知道因咩事要用。唔好係又出唔係又出，仲以為自己好有技巧，其實只係自暴其短。再者，你唔識咩係花招，你點知人地對你耍緊花招呢？愈利害的高手，出招愈簡單。

　　有一句說話，可以大約總結一下：做貪官要奸，做清官更加要奸，你唔奸又點對付貪官呢？

【出錯風險】

2009-03-15T21:46:00.002+08:00

剛剛一個星期，要幫一間公司做個有關危機管理的咨詢，我們首先須要與該公司的同事進行溝通及交流。當中有幾個問題, 曾經用作重點討論，我覺得都幾值得同大家分享一下。

　　有兩個 case，A 同事本身好有能力好聰明，佢亦意識到自己好掂，亦深信自己好掂；B 同事係一位 below average 既人，但係佢誤以為自己好掂。兩個都認為自已好掂，差別只在於，一個真係掂，一個係假扮ｏ既。

　　問題係，大家認為兩者在風險管理角度有冇分別呢？

　　呢個問題, 帶來好激烈的討論，部份管理人認為，本身掂又深信自己掂，係自信表現，係好同事，另一位根本唔掂可以炒得；又有部分管理人認為，兩者都存在問題，不過掂果位問題冇咁嚴重。

　　首先，所謂風險，當中好大範疇係被人為失誤覆蓋，即係話重點在於，將人為失誤可能性降到最低。有好多人都會誤會，人為失誤主因在於能力高低，但係其實，造成失誤的最大因素，係心理狀態。一個能力低的同事，只要安排合適工作崗位，佢係唔會出錯，反而發揮到最大效益，錯就錯在，管理人唔識做管理，唔懂得因才而任。呢個責任在管理人，而不在於同事身上。

　　其實，不論我地工作崗位在邊個階層，都要有自識同自省的能力同習慣。我地要了解自己真正的能力水平，同時要提醒自己水平的不足之處，咁樣就可以將自己犯錯既機會降低。

　　正如上述例子，兩位同事表面上有分別，但係其實兩者根本無任何分別，因為佢地心理狀態已經一致，就係大家都深信自己好掂，當你深信自己好掂, 好自然就會將問題輕視，認為自己可以輕易解決，呢個係造成疏忽失誤的最大危機。當你深信你自己好掂的同時，在風險管理立場，你既能力已經唔再最要。

　　人一定要有自信，自信係對自己既信任，當中不單單指能力，仲有心理素質。真正既自信，係對自己有充分了解，清楚知道本身優長劣短，然後小心運用自己既能力去解決問題。而唔係深信自己的之能力比別人強，然後忽略事實的存在，單單認為自己有能力去解決問題，其實根本解決唔到問題。解決問題的主要條件，係心理素質，並不是能力。

【自身素質】

2009-03-15T21:44:00.000+08:00

上次講過上司，今次想同大家分享一下做下屬的問題。

　　作為下屬，當然重點就係要將上司委派的工作，妥善完成，呢個係基本原則。因為大家真係要明白，你份糧就係要你做事，唔好嫌辛苦。一個十分簡單的道理，你俾錢去食飯，你都會要求侍應的服務態度，甚至可能有唔少人，因為人地態度唔夠好，仲去投訴添。反過來，你又掉得返轉頭嘛？你老闆出左錢請你，叫你做事，你做唔做到你要求侍應的態度呢？

　　我見好多人，不時都會話公司多野做，人工又少，呢樣果樣等等。其實，我都好同意，唔係間間公司，個個老闆都係好野，所以我唔反對人轉工，不過我會提醒佢，要知道自己因乜事想轉工。

　　如果因為你已經盡左力，將所有份內事都做好，而且已經有超越處理現在工作的能力，不妨轉工。因為你只係 seeking for better。但係如果你係因為，覺得好辛苦，好唔開心，覺得個老闆無能，或者衰，所以想轉工，我會建議再考慮一下。首先，你出去搵唔搵到起碼同等待遇的工作，其次係你要知道，你會唔會跟手又覺得辛苦要走人。

　　我真係純粹站於打工仔或者下屬的立場去講，人唔可能混混沌沌一世，如果一辛苦就走，一唔開心就走，其實問題個根源，係在你自己身上。你根本無進步過。一個有能力的人，係要首先在可發揮的條件之中，做好所有本份，甚至 do beyond the salary。

　　如果無呢個先蝕後賺的胸襟，去到邊度你都會唔開心。因為得唔到其他人尊重，自然唔會開心，係咪？

　　出來做事，胸襟好重要，唔好怕蝕底，只要你能夠有原則地去蝕底，一定會有人欣賞，呢個世界，係無懷才不遇的。當然，呢點要視乎你對自己的要求。如果你認為自己應該幾唔錯，亦有條件唔錯的話，咁你就應該好好地做好自己本份，唔好怕蝕底，樣樣都做，每樣工作都係一個好好的訓練。

　　如果你不求甚麼的話，咁就無咩所謂啦。不過，既然你對自己都無要求，唔該，亦唔好對其他人有要求，唔好話人地點點點唔好，咁先公平嘛。

【又講見工】

2009-03-15T21:41:00.000+08:00

　　早前寫過一篇講見工，其實見工呢個題目，真係閒閒地可以寫一萬幾千字。不如今次，我同大家分享下我 seat 人地 interview 的經驗好嘛？

　　每間公司每個行業，面試都略有差別，基本野唔講，即係一般技能測驗果類野。我諗大家最關心都係自我介紹，同埋問題環節呢兩個部分。回想當年我第一次見工，都係一樣咁緊張。

　　人恐懼不安的來源，其實係咩呢？恐懼不安，其實源於你對事物的陌生。簡單咁講，你安坐家中，會唔會緊張呢？哈哈。因為去到一個陌生環境，你對一切人同事都唔熟悉，唔知點做先好，所以會驚會緊張。大家都知道，咁樣係會絕對直接影響表現，咁點辦呢？

　　首先，你一定要起一起間公司個底，而家互聯網咁方便，一般資料都唔難搵。如果佢間公司規模真係好細，上網搵唔到料，咁你就要去睇一睇間公司個行業背景同資料，冇得懶架。你有左基本認識，個心就自然會定好多。

　　另外，呢個其實係不二法門，任何事情，都係熟能生巧。你做得多，就自然駕輕就熟，好似自己識女仔，又或者係俾男仔識一樣，你點黎我點去啦。所以，有機會去見工，不論份工你喜唔喜歡，都一定要去見，見左可以唔做架嘛，係咪？但係只要你肯去見，呢個就係你一個好好的經驗，見多幾次，你都已經玩慣玩熟，佢驚你都未驚。講真架，試過真係有負責面試的同事向我講：「死啦，一陣 interview 都唔知問咩好，一陣問錯好鬼樣衰架。」佢地都一樣架咋。珍惜每一次見工的機會，真係有好大幫助架！

　　累積多左經驗，到真係見一份你志在必得的工作時，你就可以以最佳狀態同表現，去應付呢個小小的面試。

　　自我介紹，其實你真係可以簡單咁講下你自己，唔好太花巧，最重要係誠意，同埋笑容。記住：笑容。當中你可以約略講下你的優點同缺點。當然，反面說話正面講，將缺點暗示成優點啦。例如，我缺點係有時做事會太認真，令到自己有一 d 額外的壓力。又或者，有時我會太過顧及別人感受，變左講說話會唔夠爽快。諸如此類啦。呢一個部分，好多朋友話我知，其實佢地主要係想睇應徵者的待人態度、自信心、說話態度誠懇等幾樣。

　　到問答環節，呢個主要係想睇應徵者應對能力同耐性，因為有時佢地會故意將問題，問完又問，睇下你有冇耐性面對問題，所以要小心。另外就係對應對能力，呢個就靠你反應同知識。知識尤其重要，睇多 d 報紙同書籍，呢個一樣係冇得懶。呢部分的問題，ki0805 個帖已經好詳細，大家可以參考一下，自己試下諗下點答，有興趣可以找我一齊研究下。

　　上面提到笑容，呢個真係好重要架，冇一個老闆，會請一個唔識笑的人。唔識笑佢點樣對客呢？況且唔笑的話，面口多數都唔多友善，久而久之會影響同事的工作氣氛。所以記住，一定要笑，可以去屋企 toilet 對住鏡慢慢練。

　　祝各位面試輕鬆愉快 ~~

【見工】

2009-03-15T21:39:00.001+08:00

最近有不少客人都有擴張打算, 所以須要出招聘廣告, 之後當然仲要 in 人, 而我亦應邀列席佢地公司的 interview , 其實每個行業請人的要求都唔同, 不過除非係重要職位, 否則做老闆都唔會一開始就要求你咩都識, 佢地會預你需要時間學習, 所以應徵者獲聘與否, 重點反而在於本身素質。　　老闆好多時會留意應徵者的反應, 說話語氣同待人態度, 呢幾點對於工作環境有好大影響, 當然我出席的要因, 亦就係為呢幾方面給予意見。

　　有時見到d應徵者, 見份 clerk 但係化行個妝, 仲要成身名牌再加個相等於佢一個月 expected salary 既手袋, 坦白講, 會請你果個老闆, 你都唔好做, 你實俾佢抽你水。又例如男仔, 係就係著恤衫西褲打呔, 但係就全部都係荷李活出品, 一樣都係唔掂。

　　大家要明白, 見工其實係一個 please 對方的過程, 一定要明白對方需要 d 咩, 而唔係你想 show d 咩。其實女仔黎講, 化個淡妝, 夏天可以恤衫西褲或西裙, 唔一定要高跟鞋, 可以一般平底鞋, 其他一應手袋公文袋, 最重要係清潔整齊, 新新淨淨, 就算用名牌都唔緊要, 但係要用得低調同有價值。例如, 你帶個 $6000 Gucci 一定唔及你用一個 FX Creation 公文袋去見一份 clerk grade。又好似男仔, 見工好返工好, 其實 G2000 已經夠晒, 要型留番去街, 無老闆鍾意同事好型咁返工架。

　　除左衣著, 剛剛提到談吐都好重要, 當中包括你 sale 自己的過程。所謂虛心學習, 作為老闆, 絕對鍾意醒目有料員工, 但係非常討厭自以為是員工。所以 sale 自己既時候, 大家切忌將自己講得太好, 或者太急於表現所有優點, 咁樣會令老闆覺得你自以為是。大家可以含蓄 d 去 sale, 例如可以提及 "你有某方面的經驗, 雖然性質唔同, 但係希望可以對新環境的學習有幫助。" 咁樣會順耳好多。

　　基本上, 大家只要記住, 恰如其份, 無過無不及, 唔好過份謙虛, 更加唔好過份自信。帶一份自知之明的謙虛, 一份勇於承擔的自信, 無往而不利。

【上司】

2009-03-15T21:36:00.001+08:00

之前有朋友問過，話佢個上司好唔得，可以點算？不如今次講下上司（老細）。

　　其實不時都聽到朋友訴苦，講自己個老細有幾衰幾冇用幾冇品；更多時係有我客人的職員，向我反映我個客佢老細有幾衰。

　　面對呢種情況，不論在朋友立場，或是業務職責，我都十分樂意地先聽佢地講完想講的說話（勞蘇），然後我會好坦白話佢地知，其實佢老闆已經唔算係我所見的老細之中，最衰果個。呢個的確係事實，並唔係安慰佢地。

　　覺得個老細唔好，不外乎果幾樣，無能、唔識管理、推卸責任、用人不當、偏心、寵信奸人、唔體恤下屬、自私自利（只顧自己升職不顧下屬死活）諸如此類。如果有一個人能夠一手包辦，佢都真係衰到貼晒地。但係普遍來講，最多都係是但中兩三樣，其實真係唔算好嚴重。因為衰老細好易應付，首先佢唔會故意去害你，甚至藉住害你的過程，不經意地表現一下自己，呢種老細，叫做奸老細，先係最難應付。

　　奸老細，係會故意俾陷阱你踩，然後仲要一派正氣出現助你渡過難關。為的是表現佢對下屬的關懷承擔，以及佢本人的危機處理能力及卓越領導才能。勁嘛？呢ｄ先難搞嘛！難就難在，佢真係有能力有智慧，更加有手段。你點同佢玩呢？當你面對呢種老細，你又點樣自處，點樣生存呢？　　

　　所以，一般衰老細，雖然佢都係唔好架喇，不過大家亦唔需要太過執著。

　　如果個個都係勁人，咁你仲點上位呢，係咪？跟著個唔好的老細，並實係一個好好的經驗，亦係一個訓練你越級進步的好機會。因為好多時你需要協助，甚至代佢處理部分事情，過程之中，你會得到好多超越你本身職位的工作經驗。再者，同一個咁樣的老細相處，亦可以好好地訓練自己的情緒智商。

　　當然，並唔係叫大家自欺欺人，盲目咁去死做爛做。在做的過程，你要適當地保護自己。如果個老細係值得你幫的話（能力唔夠但係人品都唔錯），你當然要幫啦，佢一定會感恩圖報，因為佢都想有個人幫到佢，互相幫助又合作愉快，絕對十分理想。

　　如果佢係唔值得幫的話（能力唔夠人品又唔夠），咁係就要睇下，佢上面仲有冇老細，如果仲有的話，不妨盡自己能力幫左先，你有料總會有人欣賞的。如果真係冇人欣賞，咁你就可以認真咁考慮一下，係唔係需要同值得轉換一下環境。當然啦，首先你要清楚，問題會唔會係出自你自己本身啦。

【升職之後】

2009-03-15T21:30:00.001+08:00

其實大家只要有咁上下年資，學歷又達到基本要求，升職真係在所難免。

　　個人經驗，升職的同事，尤其係升到中層管理，即係主任級或者開始要管人的同事，普遍有會出現若干問題。當中的問題，主要來自同事的本身，亦同個人的主觀願望有密切關係。

　　有一位同事，根本無野心要升職，不過因為真係做得好好，而且對工作好熟悉，所以一級級咁升上去，開始要管人。但係佢分唔到，咩工作要下放，咩工作要親自做，以及做管理應該要做咩，完全無概念。結果，職係升左，不過工作無任何改變。以前係佢做的，依然係佢做，而管理要做的，無做。因為佢未適應，如何指導同引導同事，去完成工作，亦未能掌握如何為同事安排工作。

　　又有一位同事，學歷唔夠，做事欠缺合作，不過對工作都算熟悉，其實原本根本有排未會升佢，不過佢去扭一扭，因為當時一些環境因素，結果升左佢上去。升左之後，就開始運用權力，將同事工作隨心所欲咁安排，又開始建立特權，搞小圈子，將部門入面的分組，界線劃分得好清楚，你還你，我還我，不過我有事，你地要幫拖。哈哈。

　　其實升職，站於公司立場，係想多一個管理人，幫手做管理工作，而唔係為左將你個職銜提高一級。

　　升職附帶的，就是權力。但係權力賦予左俾你，唔代表你就真係有指揮能力。權力只係令你可以明正言順去處理問題，安排工作，管理下屬。但係下屬聽唔聽你，其他同事幫唔幫你，就唔係權力可以改變。

　　真正的權力，其實亦即係管理者的動員力，你可以動員到幾多人在你領導同引導下，一同完成工作。當中亦要求你有足夠的領導指揮能力。

　　其實作為管理者，要明白一點，你的工作已經由執行變成管理，管理就係要領導同事去完成工作。而唔係利用你的地位，去增加個人優越感。管理就係要領導下屬，如果下屬根本唔 buy 你，唔服你，甚至唔鍾意你，咁你個管理仲點做落去呢？

　　領導管理，用的是技巧同方法，令同事愉快地同你一齊解決困難完成工作。權力，只係方便你處理問題，所以唔好隨便使用，非不得已都唔好顯示你的權力。

【中層管理】

2009-03-15T21:28:00.001+08:00

呢幾日做的工作，都跟中層管理有關。中層管理，最直接例子，就係每個部門裡面的 Section Head，須要管理一 team 同事，要負責安排工作，協調組入面同事的問題。

　　中層管理同事，其實往往都唔太懂得管理，只係做得有咁上下日子，自然就升到呢個位，又或者因為原本的上司一路離開，所以唯有由佢頂上等等，如此種種，都令中層管理或多或少出現問題。

　　我客人間公司入面，其中一位 section head，經常爆鑊，但係爆左鑊之後，又只係得佢去執手尾，下面班同事好似路人甲乙丙，夠鐘就放工。佢老闆（即係我個客）就叫我同佢傾傾，究竟問題出在何處？傾左一輪，又睇左佢地 team 同事日常工作，發覺問題的確在 section head 身上。

　　下屬係要管的，唔需要管的就不是下屬。當然一定要管得其法。有一副對聯，對管理人員十分有用。

能攻心則反側自消，從古知兵非好戰

不審勢即寬嚴皆誤，後來治蜀要深思

　　其實管理藝術，精妙就在於寬同嚴，好多人一味寬，對個個人都好，唔敢得罪任何人，結果到有事，無人會去幫佢，因為佢平時一味好人，在下屬心目中無性格亦無威信。亦有好多人，一味用嚴厲手法，令到個個人見到佢都驚，當然到有事，一樣無人幫佢，大家都知點解。

　　當然，管理者首先一定要有能力見識，呢個可以解決到好多管理問題，因為下屬心服口服，自然易搞好多。最怕就係本身唔夠料，但係又誤以為自己好掂，相信大家平日都見唔少，呢類根本無得搞。所以首先真係要有自知之明，明白自己有幾多料，下屬唔太介意你唔叻，但好介意你扮叻。

　　個人經驗，在原則，制度上面，一定要嚴；在私底下，人情上，可以寬。

　　要有規矩俾下屬有辦事依據，亦有人情去關心下屬，真關心呀，唔好扮呀，大家都係成年人，冇得呃架。要讓下屬又敬又愛又怕又離不開，先至係高手。有情有義有理有節，係高手的基本條件。

　　最後真係要再提一次，下屬唔太介意你唔叻，但好介意你扮叻。真架．．．．．．

【風暴．生存】

2009-03-15T16:29:00.000+08:00

相信近來最熱門都係所謂金融海嘯，其實我本人唔太喜歡呢個名。一來呢個只係報紙因為上次用左風暴，今次用海嘯，唔想撞名。二來，都已經夠慘啦，仲要整個咁名，驚仲唔夠死咩？我中左鎗，唔使你代我形容有幾痛下嘛？

　　不過，的而且確，呢鑊真係好金！金在呢次問題出左企業身上，而九七果次，主要出左人身上。九七果次，主要係炒輸股票地產，而今次係企業實質業務受到影響。炒賣輸左，一定程度上都叫做係自作自受，但係企業實質業務今次出事，係由於金融機構自身難保閂水喉，搞到原本無事的企業都出事。

　　我有部分客戶，呢兩三個月陸續俾銀行減信貸額，或至加信貸息率，令到周轉好有問題，而事實小弟忙亦係因為呢個原因，要幫佢地同銀行講數。

　　今次金融問題的最壞情況，其實仲未浮現，所以大家真係要有心理準備，唔好心存僥倖。面對絕境，只要氣定神閑，計好條數，唔一定會死人，所以唔好灰心。

　　不論打工好，做生意好，都一定會遇到逆境，捱得過就已經係成功的重要基石。逆境愈勁，你將來成功亦愈大。今次個逆境，話大唔大，話細亦唔細，大過九七，細過七三啦～

　　面對困難，我地首先唔好自己嚇自己，唔好一味向壞處想，一味諗而家有幾衰。每件事都一定有好的影響，每個困難亦總有更衰既過去。你話而家衰，衰得過我地阿爸阿媽果代，真真正正飯都冇得開咩？我地而家衰極都仲有飯食，佢地連食都冇得食，三日先食一餐。既然我地父母，再困難都捱得過，點解我地唔得呢？

　　小弟亦艱難過，而且非常咁艱辛。所以有小小體會想同大家分享下。

　　當處逆境絕地，首先我會諗，點樣死唔去，即係點樣可以繼續生存。第一件事，只要保障到生存問題，有飯開有地方住，就已經有踏腳石俾你過呢個難關。呢個時候，一定要令自己明白，所有人都艱難緊，唔好再發夢，唔好諗自己有幾叻，最緊要係生存。

　　到你可以安全穩定到生存之後，就可以諗下打算下，整體環境個變化，有咩地方你可以好好利用，增加你自己的實力。包括可以係收入，亦可以係學歷知識。好似小弟，下年將會再讀書，增加一下實力。因為既然個市唔好，勉強去做，分分鐘領野。

　　所謂把握機會，並唔係指一味向前衝大小通殺。把握機會，係指適當時候做適當事情。個市唔好，你去好好努力增加自己的智慧能力，到個市好番，你就可以大展拳腳啦。再者，機會可能只係出現一刻，但係你去迎接把握呢一刻，可能就需要一兩年去準備好自己。

　　逆境，係強者歷練的好時機，無經過艱辛磨練，係唔可能成為強者。

　　我地要對自己有信心，亦要懂得面對現實。個市唔好係事實，你再驚都改變唔到，唯一要做同可以做既，就係將當中的有利條件盡量發揮。

　　天助自助者，我地唔好望要人幫，首先做好自己本份，自然能夠有出路。試下問問自己，你真係需要人幫咩？定係只不過你過慣順境？

　　我相信呢度既朋友，都係對自己有要求既人，我對大家有信心，我地一齊努力，在風暴海嘯之中生存！

【做錯點算?】

2009-03-13T20:38:00.001+08:00

久不久就會有老闆或者上司，向我投訴下屬做錯左野，仲要諸多解釋，態度好有問題。當然第一時間，我會先向個下屬了解發生咩事。好有趣地，每次得到的答案，第一句幾乎全部一樣：「我已經好小心架喇，都係因為xxxxx，所以先會出問題，意外冇人想架嘛，你估我想錯架咩？俾人鬧你估好得意呀，玩下手工都冇埋架嘛。」

　　大家捫心自想，曾經有冇咁樣答過？　　

　　話說回來，作為打工仔，工作出左錯，不論關唔關自己事，都希望「令到」唔關自己事。心態好正常，但係並唔代表正確。所謂正確態度，係指令事件得到完滿解決，又令上司或老闆唔鬧你的態度。

　　作為下屬，當工作出錯，往往第一時間，就係解釋。解釋點解會出錯，但係出錯原因，永遠同自己無關，一定係因為其他人其他事，令到出錯。常見答案有：「唔關我地事架，係佢地將文件亂咁放，所以先會漏左做。」又或者答：「係個客自己講得唔清唔楚，咁咪以為照以前咁做囉，佢有野改應該講得清楚 d 嘛。」

　　好明顯，目的都係為左將事件之中自己的責任降到最低，希望令到上司老闆，認為出錯唔係你做得唔好，只係意外。呢個係作為下屬的想法，但係你又有冇諗過，上司老闆係點諗呢？凡料事者，必先料人。你連對方諗緊咩都唔知，你點可能正確處理件事情呢？

　　身為負責人或者領導者，當有問題出現，佢地唔係要聽解釋，佢係要聽解決方法，同預防措施。將事件對公司的影響減到最低。每一個 mistake 都係錢。任何錯誤出現，就代表現行工作制度有漏洞，當然亦因為負責同事的疏忽。疏忽係冇得解釋冇得辯駁，如果你真係咁細心，根本唔會有錯，就係因為大安指意，一時漏眼，先會出錯。呢個絕對係同事的責任。呢個時候，你仲繼續為自己解釋，希望上司明白係意外，係大錯特錯。

　　因為大家都明白，人一定會犯錯，所以上司老闆，都會接受一時疏忽出錯，只要你面對自己疏忽，承認責任，知道自己今次點解出錯，上司老闆其實已經 ok。跟住佢要聽的，係你處理呢個錯誤的方法，同預防唔同樣錯誤再發生的建議措施，當然能夠舉一反三，連其他有關工作都可以一同檢討，就真係冇得頂。

　　簡單咁講，當你工作出錯，第一時間要諗的事情，係點樣解決可以將公司損失減到最低，其次就係點樣可以有效防止相類事情再出現。至於你的責任，在上司老闆角度，其實唔使推，因為根本就推唔甩，一定係你，所以唔好浪費自己口水，更加唔好浪費上司老闆時間，死罪黎架。

　　其實有一點真係好重要，你負責的工作有錯誤，你仲推咩呢？捫心自想，你係上司，你下屬負責的工作出錯，你會認為唔關佢事咩？況且，你收得人工，你就要負責做妥工作，有任何錯誤，都係你責任之內架。

【上位】

2009-03-13T15:48:00.001+08:00

　　早一排跟幾間公司的 middle management 做了一個 briefing，係有關作為管理層的心理質素。當中包括分別面對上司及下屬時候的心態，其中頗大篇幅談及自己上位，以及面對下屬上想位的心態。

　　近年的年輕一輩，對上位的渴求非常熱中，呢個係人之常情，不過要求之有道，得之有法。

　　同呢班中層管理人傾談，佢地同樣都覺得，現在的後生，上位的手段，好多時會過左火位，有時仲會有少少不擇手段，六親不認的表現。不難發現，亦好不幸，呢個係事實。

　　點解會咁樣呢？因為想快。年輕人初生之犢，好容易會認為自己身懷絕學，天下無敵，亦會認為自己並非池中之物，包括當年的我在內；又或者只係因為好簡單的原因，想力爭上游。點都好，佢地的目標好一致，就係要快上位。佢地會認為，做好人無好報，反而俾人叫傻仔；出心用心去幫人，點知俾人搵笨，搵完笨仲要唱添；穩穩當當做好自己本份，俾人話唔上進；正正經經去努力充實自己能力，俾人話死固固。

　　眼見果 d 走精面，呃呃氹氹，吹噓拍馬見風轉舵，身邊所有人所有事，都以利益衡量，不惜踩住其他人的膊頭上，即使果個係佢朋友的人，極速上位，高職高薪。於是把心一橫，點解要做好人，俾人踩住上？不如自己都做衰人，踩住人地上啦。無可否認，只要你可以狠下心腸，走捷徑走精面，有需要時出賣朋友，你一定好快上到位，我保證！

　　但係你又有冇諗過，你上的呢個位，其實有幾高呢？

　　不擇手段，的確好快就上到位，但係亦好快上到你個人的極限，即係你上完呢個位，以後都唔使再上。簡單來說，你可能可以好快做到經理，但係亦永遠只可以係經理，仲要分分鍾俾人拉番落去添。呢個我可以更加保證！點解？

　　既然你在損人利已的情況下上位，咁即係你會傷害得罪好多人，當中仲可能包括你的朋友，對嘛？當你身邊所有的人，在你上位的過程，因為被你傷害過而通通變成你的敵人，佢地會點對你呢？你做佢地上司，佢地會真心幫你咩？作為上司，下屬唔出心出力幫你完成工作，後果自己諗下啦。

　　另外，你今日為左上呢個位，所以犧牲你身邊的人，你再要上位，再要犧牲的，就係以前高級過你，而現在同你同級的人，對嘛？咁樣，你認為你現在的上司上級，仲會唔會俾機會你去犧牲佢地呢？

　　山登絕嶺有高峰，千萬唔好以為自己聰明絕頂，呢個世界，真正聰明的人，永遠唔會深信自己聰明。真正智者，會不斷提醒自己，小心自己的聰明才智，令自己失敗。所以唔好以為：佢地係蠢人，都唔知我出賣左佢地。可能俾你出賣的人真係唔知，但係你可以肯定，所有人都係蠢人？

　　我唔係叫大家唔好上進，唔好搏上位，千萬不要誤會。我只係提供一個，可以上位上得最高，走得最遠，坐得最耐的方法。呢個世界，係無懷才不遇架。只要你有料，一定會出到位。仲未出到位，只係因為一個原因，你根本未夠能力出位。

　　在商場上面，甚至係政治舞台，真正既強者，會好似一隻仁慈既獅子，賦有強大力量，足以保護自己，亦足夠攻擊敵人，但係絕不輕易出手。大前提係，能夠以和平方法解決，一定尋求和平解決。但係該出手時，亦絕對當仁不讓。

　　所以，工作最有實力的朋友，才能夠一直保持良好聲譽，在商業競爭之中，仁慈包容對待人和事。而呢種人，在商業競爭之中，未必會係最快上位的人，但絕對係走得最遠的人。只有實力非凡，先可以在競爭之中仁慈包容。不擇手段心狠手辣，其實只能夠證明一件事，就係你根本唔夠料，所以先要出矛招。由細到大，都係咁架啦，夠人打使乜出矛招呀？